Macaca Cangrexeira
(Macaca fascicularis)
Características
Clase: Mammalia
Orde: Primates
Familia: Cercopithecidae
Peso: Entre 2,5 e 8 Kg
EVM: Entre 27 e 37 anos
Capacidade especial: Saben nadar á perfección e aliméntanse de cangrexos.
Alimentación: Froita, sementes, follas, insectos, peixe, ras e cangrexos.
Hábitat: Bosque tropical do Sueste Asiático.
Distribución: Distribúese amplamente no sueste asiático, incluíndo Indonesia, Filipinas, Malaisia, Tailandia, Camboxa, Laos, Vietnam, Myanmar, Brunei e Singapur. Tamén se atopa en Hong Kong e nalgunhas illas do océano Índico e Pacífico debido a introducións. Habita en diversos hábitats como bosques tropicais, manglares e áreas costeiras, adaptándose ben a zonas próximas a asentamentos humanos.
Descrición
DO LABORATORIO Á EXTINCIÓN
A macaca cangrexeira denomínase en feminino posto que o nome científico así o determina, Macaca fascicularis. Trátase dunha das especies máis utilizadas para a experimentación animal nas últimas fases de probas para o uso de fármacos e outros produtos. En Europa, a experimentación animal para produtos de cosmética está prohibida, pero aínda non existe a biotecnoloxía necesaria para desenvolver fármacos seguros para os humanos sen pasar previamente por primates. Xa sexa para fármacos como a vacina da COVID ou tratamentos contra o cancro, ou probas menos determinantes como o nivel de afectación pulmonar ao fume dos coches, hoxe en día esta especie segue sendo utilizada para a experimentación.
Non obstante, en 2022, estes primates, que ata ese momento se consideraban en bo estado de conservación, foron catalogados como en perigo de extinción. Desafortunadamente, a diversidade xenética dos animais de laboratorio non é alta, polo que non son válidos para a reprodución nin para a liberación, xa que non poderían sobrevivir. Nin sequera naceron coa súa nai ou en compañía do seu grupo.
En Marcelle
Marcelle acolleu en marzo de 2014 un grupo numeroso de femias desta especie. Algunhas con máis saúde ca outras, debido á experimentación animal, neste caso coa pílula anticonceptiva das mulleres.
Actualmente, o grupo está composto por 13 macacas que conviven seguindo un complexo sistema xerárquico lineal, onde cada unha desempeña un papel fundamental para o equilibrio do grupo. Estas relacións non son aleatorias: os lazos afectivos que se crean entre elas reflíctense nos momentos de acicalamento, reforzando a súa estrutura social.
A pesar das diferenzas de saúde e carácter entre as integrantes, a cohesión do grupo é evidente. Comunícanse de maneira precisa e efectiva, resolvendo conflitos a través de vocalizacións e xestos sutís que regulan a convivencia na parcela.
