Burro Común - Currito, Mami, Pedrín
(Equus asinus)
Características
Clase: Mammalia
Orde: Perissodactyla
Familia: Equidae
Peso: Depende da raza, poden acadar os 250 kg de media.
EVM: 25 anos
Alimentación: Herbívoro.
Hábitat: Practicamente en todos os hábitats.
Distribución: Cosmopolita.
Estado de conservación: Non ameazado
Descrición
DE IMPRESCINDIBLES A ESQUECIDOS
Aínda que o estado xeral de conservación é ‘non ameazado’, o burro común está en perigo de extinción na Península Ibérica. A mediados do século XX había censados en España 675.000 asnos, hoxe só hai uns 30.000. Recoñécense seis razas diferentes de asnos: Andaluza, Asno das Encartacións, Catalá, Mallorquina, Majorera e Zamorano-Leonés. Todas elas atópanse protexidas xa que están en grave regresión ou en trance de desaparición. Estas 6 razas supoñen o 43 % do total das razas europeas (16).
Tradicionalmente, os burros foron usados para a agricultura e o transporte de persoas ou material, principalmente de labranza. Hoxe en día foron substituídos por maquinaria, e para manter esta especie é imprescindible crear novas utilidades para eles e así evitar a extinción. Unha posibilidade é destinar unha parte desta poboación á conservación de bosques para as seguintes accións:
– Prevención de incendios
– Limpeza de bosques
– Apertura de sendeiros
En Marcelle
CURRO – recibe o nome polas súas características patillas grises. El, como tantos outros, pertencía ao mundo rural galego ata que faleceu a súa única compañeira humana, unha muller que o soubo tratar moi ben desde que era pequeno.
A súa familia non podía facerse cargo del e en Marcelle Natureza pode gozar da compaña doutros burros, aínda que a súa crianza estivo tan vinculada ao ser humano que necesita unha atención máis individualizada por parte das persoas para satisfacer as súas necesidades.
MAMI e PEDRÍN – De capa negra os dous, nai e fillo. De carácter moito máis independente xa que foron criados de forma natural.
É frecuente ver os adestramentos que realiza o Departamento Animal. O obxectivo é dar a cada individuo a atención humana que necesitan xa que se trata dunha especie doméstica.
