En Marcelle viven as dúas femias (Mimo e Mami) separadas do macho Chicho debido a unha incompatibilidade social deste con Mimo. Poden pasar os días xuntos a través do valo, pero no momento en que se xuntan, el non pode soportar a súa presenza e agrédea. O manexo ao que foron sometidos no pasado tivo consecuencias nos seus caracteres e patoloxías individuais. No caso de Mimo, foi bautizada con este nome porque, ao chegar, manifestaba un absoluto rexeitamento ao achegamento aos humanos e mostraba signos claros de estrés ante o manexo de calquera tipo de corda e/ou pau. Co paso do tempo descubriu que as mans humanas, a través do valo, tamén poden facer cóxegas e mimos, e converteuse en dependente deses pequenos vicios. Mami tivo unha filla no centro que posteriormente foi trasladada a outro parque para evitar a consanguinidade, de aí o seu nome. No caso de Chicho, o nome débese ao seu comportamento xoguetón coas femias.