En Marcelle permitiuse a reprodución desta especie ata acadar un grupo familiar, de xeito que poidan vivir dunha forma o máis similar posible ao seu estado natural nos seus bosques tropicais. Actualmente vive un grupo estable de 6 individuos.

Comportamento: como consecuencia das condicións de aloxamento inadecuadas do pasado, pode observarse en Golliat un comportamento extremadamente protector cara á femia, Burriana, chegando a lanzarse contra o cristal. É importante evitar calquera situación que lles transmita dano ou medo, como golpear os cristais, usar flash nas cámaras, mirar fixamente aos ollos ou berrar moi alto.

Os zoolóxicos elixidos para levar a cabo reubicacións de animais están realizando unha función social ao prestar axuda no ámbito da protección e conservación da fauna salvaxe, xa que non existen suficientes centros en España para acoller a todos os animais non domésticos que se manteñen como mascotas de forma ilegal.